WalesLab

Rydyn ni’n falch iawn i gefnogi y cynllun i ddatblygu syniadau creadigol, WalesLab sy’n cael ei redeg gan National Theatre Wales. Mae Theatr Genedlaethol Cymru wedi bod yn rhoi mewnbwn i’r syniadau iaith Gymraeg ers cychwyn y cynllun, ac wrth i’r cydweithio ddyfnhau y gobaith yw gweld twf yn y prosiectau iaith Gymraeg sydd yn cael eu cynnnig i’r cynllun.

Mae’r fenter unigryw hon yn gyfle i artistiaid sydd eisiau datblygu syniadau theatr newydd, gan ddod â rheiny sydd â syniadau creadigol at ei gilydd boed yn ysgrifenwyr, cyfarwyddwyr, actorion, coreograffwyr, dylunwyr neu’n gynhyrchwyr amlgyfwng. Mae WalesLab yn gwahodd ceisiadau ar gyfer prosiectau yn Gymraeg ac yn Saesneg, ac fe fydd Theatr Genedlaethol Cymru yn cynnig cefnogaeth ar gyfer y prosiectau sy’n ymgeisio trwy’r iaith Gymraeg.

Meddai Simon Coates, Cydymaith Creadigol National Theatre Wales;

“Mae National Theatre Wales wrth eu bodd i allu weithio’n agosach gyda Theatr Genedlaethol Cymru – cwmni sydd yn cael eu adnabod am arbrofi gyda phrosiectau newydd yn yr iaith Gymraeg – ar raglen WalesLab. Mae’r cydweithio yma yn cynnig cymorth delfrydol i syniadau ac artistiaid i weithio trwy gyfrwng y Gymraeg a’r Saesneg.”

Mae WalesLab yn gwahodd ceisiadau erbyn yr 28ain o Fawrth 2014. Fe fydd mwy o gyfleon i gynnig syniadau yn y dyfodol. Ceir ffurflen gais a gwybodaeth ar wefan National Theatre Wales, neu am sgwrs bellach cysylltwch â Theatr Genedlaethol Cymru.
http://nationaltheatrewales.org/cy/waleslab

Holi Siwan

Cafon ni air gyda Siwan Griffiths, sydd yn gweithio fel Dirprwy Reolwr Llwyfan ar Y Negesydd ac ar daith yn ystod mis Mai.

Beth yw gwaith Dirprwy Reolwr Llwyfan?

Mae gwaith Dirprwy Reolwr Llwyfan yn cynnwys amryw o ddyletswyddau – o’r diwrnod cyntaf mae’n rhaid gweithio gyda’r Cyfarwyddwr i reoli’r ystafell ymarfer, amserlenni ymarferion, cadw cofnod o oriau actorion, creu adroddiadau ymarfer ar ddiwedd pob diwrnod, blocio, promptio, gweithio yn agos iawn gyda’r adran sain a goleuo yn yr ymarferion dechnegol, ciwio sioeau, creu adroddiadau sioe ond y peth mwya’ pwysig yw bod yn drefnus!!

Y peth ti yn edrych ymlaen fwyaf at wrth weithio ar y negesydd?

Un o’r prif bethau dwi’n edrych ’mla’n amdano fwyaf yw bod tu mewn i’r ystafell ymarfer, yn gweithio’n agos gyda’r sgript, y Cyfarwyddwr a’r actorion. Dwi hefyd yn edrych ’mlaen yn fawr i fynd i weithio gyda Theatr Felin Fach ac i dreulio tair wythnos yn yr ardal.

Sut deimlad yw fod yn Ddirprwy Reolwr Llwyfan am y tro cyntaf?

Cyffroes, a dwi ffeili aros i ddechrau’r ymarferion.

Y peth ti yn ofni fwyaf wrth weithio ar y negesydd?

Bod heb ‘Lili’ fy nghi pan dwi ffwrdd ar daith!!

Dy brofiadau di o weithio efo’r cwmni?

Ers dechrau blwyddyn yn ôl gyda’r cwmni fel Rheolwr Llwyfan Cynorthwyol, rwyf wedi bod yn ffodus i allu gweithio ar amryw o gynhyrchiadau hollol gwahanol, mewn amgueddfa, i dop mynydd Tomen Y Mur, ac i nifer iawn o theatrau gwahanol o amgylch Cymru. Mae wedi bod yn flwyddyn brysur, amrywiol, addysgiadol a llawn sbort! Mae’r cwmni yn gwmni cyfeillgar iawn, ac yn sicr dwi wedi creu ffrindie da allan o’r profiad o weithio yn ‘Y Llwyfan’. Ond yn bersonol, fy niolch mwyaf yw i’r Adran Gynhyrchu – Ryan Evans (Pennaeth Cynhyrchu y cwmni) ac Angharad Jones (Rheolwr Llwyfan y cwmni) – maent nid yn unig wedi dysgu llawer iawn o bethau i mi am reoli llwyfan, ond wedi fy ysbrydoli i gario ’mlaen a gwneud bywoliaeth yn y diwydiant. Drwy gydol y flwyddyn mae’r ddau wedi bod yn gefn i mi, yn ystod ymarferion ac ar daith, ond yn bwysicach oll, wedi magu hyder i mi fel unigolyn i rannu fy syniadau a’m profiadau tra’n cydweithio ar deithiau gyda’r cwmni.

Beth wyt ti yn gwneud nesaf?

Byddaf yn gweithio gyda ‘National Youth Theatre’ ar gynhyrchiad ‘Dead,Born,Grow’ ac yna ymlaen i Eisteddfod Yr Urdd a Theatr Yr Urdd. Misoedd prysur iawn, ond dwin edrych mlan yn fawr!

Croesawu Sara Lloyd

Sara Lloyd, Aled Jones Williams, Owen Arwyn.

Helo! Sara Lloyd ydw i a dwi wedi dechrau gweithio efo’r Theatr Genedlaethol wythnos yma fel Cyfarwyddwr Cyswllt. Dwi’n falch iawn i ymuno efo’r cwmni a’n edrych ymlaen i’r cyfnod i ddod. O fewn y swydd mi fyddai’n cynorthwyo’r Cyfarwyddwr Artistig, Arwel Gruffydd, i ddatblygu dramau ac yn cyfarwyddo ambell i sioe. Dwi wedi bod yn cyfarwyddo ers rhai blynyddoedd a chyfarwyddais Pridd, sioe un dyn gan Aled Jones Williams, i’r Theatr Genedlaethol yn yr hydref. Fe agorodd Pridd yn Y Llwyfan yng Nghaerfyrddin ac wedyn aeth ar daith o amgylch Cymru. Yn ogystal a chyfarwyddo rwyf wedi gweithio fel actores ers dros ddeng mlynedd, yn ddiweddar roeddwn i yn y gyfres Gwaith Cartref ac Y Gwyll. Mae nifer o bethau’n debyg rhwng actio a chyfarwyddo ac rwy’n teimlo bod un yn bwydo’r llall.

Mae hi wedi bod yn braf iawn bod yng nghartref y Theatr Genedlaethol , yn Y Llwyfan, wythnos yma a gweld y paratoadau ar gyfer sioe nesaf y cwmni, Y Negesydd. Wedi ei osod yn y pumdegau,  mai’n ddrama am ferch ifanc sydd gyda dawn arbennig. Mae’r ddrama wedi ei leoli yng Ngheredigion Cymru ac mae hi mor hyfryd clywed acen a geiriau Caryl Lewis yn dod yn fyw.

Dros y misoedd nesaf rwy’n edrych ymlaen i ddechrau gweithio efo artistiaid, boed yn ddramodwyr, yn gynllunwyr set , cynllunwyr sain ac actorion o Gymru a thu hwnt ac hefyd i dreulio mwy o amser yn yng Nghaerfyrddin.

Hi! I’m Sara Lloyd and I’ve started working at Theatr Genedlaethol this week as an Associate Director. I’m thrilled to be working with the company. My role is to assist the Artistic Director in developing plays. I have been working as a director for some years and directed Pridd, by Aled Jones Williams for the company in the autumn. I’ve been working as an actress for over ten years, recently in the series Hinterland. I enjoy the cross over between directing and acting and feel that one feeds the other.

I’ve very much enjoyed being in Y Llwyfan this week and seeing the preparations for the company’s next show, Y Negesydd. Set in the fifties, the play centres around Elsi, a young woman with an extraordinary talent. Caryl Lewis’ beautiful use of language is a delight to listen to.

Over the coming months I’m looking forward to start working with artists, playwrights, set designers, sound designers and actors from Wales and beyond.  I’m also looking forward to working and spending more time in Caerfyrddin being based at Theatr Genedlaethol’s home in Y Llwyfan.